SFE på lag med Sogn og Fjordane Fotballkrets
Sogn og Fjordane Fotballkrets har inngått ein ny laugsavtale med Sogn og Fjordane Energi (SFE). SFE blir med dette ein av dei største økonomiske støttespelarane til fotballkretsen dei neste tre åra.
SFE har dei siste 3 åra vore ein av fotballkretsen sine største samarbeidspartnarar, og no har partane inngått ein ny treårig avtale som mellom anna bidrar til å sikre kretsen si satsing på breiddefotballen i fylket.
- Det er svært gledeleg at Sogn og Fjordane Energi blir med på laget også dei neste tre åra. For oss er det viktig med langsiktige samarbeidspartnarar, og avtalen sikrar oss føreseielege rammevilkår til den vidare utviklinga av fotballsatsinga i fylket, seier Svein Olav Myklebust, dagleg leiar i Sogn og Fjordane Fotballkrets.
Delar av avtala mellom SFE og fotballkretsen er øyremerka satsinga på dommarutvikling. Totalt har fotballkretsen ca 60 dommarar i sving på gras og grus i fylket, og rekrutteringa har årleg omfatta 40 nye rekruttdommarar årleg seinare åra.
- For oss er det viktig å bidra til aktivitetar som er inkluderande og som bidrar til trivsel og utvikling i fylket vårt, og då er fotballkretsen ein svært naturleg samarbeidspartnar å spele på lag med. Fotballkretsen er ein organisasjon som engasjerer og aktiviserer enormt mange, både aktive utøvarar og eldsjeler, unge og eldre, seier Kai Petter Sårheim, kommunikasjonsdirektør i SFE.
SFFK har i perioden auka talet utdanna rekruttdommarar, og har no fått økonomiske musklar til å utvikle fleire treffpunkt mellom kretsen sine fagfolk og dommarane. Mellom anna gjeld dette talentgruppe Danmark (unge dommarar), toppgruppesamlingar og oppfølging av unge dommarar på cupar og turneringar. Saman med SFE har kretsen sett fokus på ”miljø og ansvar” gjennom profilering av SFE sin ”Ta ansvar”-kampanje. Her tar ungdomen både miljø- og leiaransvar. Vi er stolte av dommarungdomen som løyser denne oppgåva på ein framifrå måte i 40 årlege arrangement, som samlar nesten 40 000 menneske.
Kretsen har alt profilerte internasjonale dommarar, som Tommy Skjerven og Steinar Holvik. Satsinga siste åra gjort at vi har fått eit nytt oppsving, og nemner at Joakim Knapstad og Frode Ølmheim er etablert som divisjonsdommarar. Artig er det også at Anja Amundsen (KIL) er med i NFF si satsingsgruppe for unge lovande dommarar.
- Dommarutvikling er eit viktig satsingsområde for oss. Utan tilstrekkeleg rekruttering og utdanning av dommarar ville vi ikkje ha moglegheit til å oppretthalde eller auke den aktiviteten vi har i fotballkretsen i dag. Ikkje minst spelar dommarane ei viktig rolle i det haldningsskapande arbeidet blant dei yngste spelarane, og dette er noko vi har stadig meir fokus på, seier Myklebust.
For meir informasjon:
Svein Olav Myklebust, dagleg leiar i SFFK: svein-olav.myklebust@fotball.no eller 901 03 595
Kai Petter Sårheim, kommunikasjonsdirektør i SFE: kai.petter.sarheim@sfe.no eller 952 56 112